DK. SHEIN ATEUA MAJAJI, MWENYEKITI MAHAKAMA YA ARDHI

Dk. Shein ateua Majaji, Mwenyekiti mahakama ya ardhi

Na Mwandishi Wetu

RAIS wa Zanzibar na Mwenyekiti wa Baraza la Mapinduzi, Dk. Ali Mohamed Shein, amefanya uteuzi wa majaji wanne wa Mahakama Kuu ya Zanzibar.

Kwa mujibu wa barua iliyosainiwa na Katibu Mkuu Kiongozi na Katibu wa Baraza la Mapinduzi, Dk. Abdulhamid Yahya Mzee, imewataja majaji walioteuliwa ni Jaji Fatma Hamid Mahmoud, Jaji Rabia Hussein Mohammed, Jaji Mkusa Isaac Sepetu na Jaji Abdul-hakim Ameir Issa.

Kwa mujibu wa barua hiyo uteuzi huo umefanywa na Rais wa Zanzibar chini ya kifungu 94(2) cha katiba ya Zanzibar ya mwaka 1984.

Aidha katika barua hiyo Katibu Mkuu Kiongozi alieleza kuwa umeanza rasmi Novemba 26 mwaka huu.

Wakati huo huo, Rais wa Zanzibar na Mwenyekiti wa Baraza la Mapinduzi amemteua Haroub Sheikh Pandu kuwa Mwenyekiti wa Mahakama ya Ardhi.

Taarifa ya Katibu Mkuu Kiongozi imeeleza kuwa uteuzi wa Mwenyekiti huyo ambao umeanza rasmi Novemba 26, umefanywa na Dk. Shein chini ya kifungu 4(1) cha Sheria ya Mahakama ya Ardhi namba 7 ya mwaka 1994.